MONDONHEDO

Noutrora chamada Vila Maior, Mondonhedo é umha vila galega com cerca de 4.500 habitantes. Foi capital dumha das sete províncias do antigo Reino da Galiza.

As origens desta vila remontam-se à configuraçom da diocese mindoniense por um grupo de refugiados Britões chegados desde as ilhas britânicas escapando das invasões de anglos e saxões nos séculos V-VII, assentados antes no local de Bretonha (Brittonnia).

O auge de Mondonhedo começa em 1117, quando é sediada na cidade a diocese. Em 1156 o rei Afonso VII eleva a vila, na época município, para a categoria de cidade. Em 1230 inicia-se a construçom da catedral e em 1320 é construída umha muralha para cercar a cidade.

Desde o ano 1491 a vida municipal estrutura-se no concelho municipal, estando sob o controlo do bispo, senhor da cidade, que nomeava também as autoridades locais.

Mondonhedo contou com umha comunidade judaica ao abrigo do grande mosteiro de Vila Nova de Lourenço, no nível dos mosteiros de Sobrado e Meira, e que protegeu os habitantes da judiaria polo seu labor de administradores e angariadores de impostos. Neste caso os judeus de Mondonhedo tinham a proteçom direta do bispo.

Outro dos motivos da presença judaica em Mondonhedo acha-se na pujança económica da cidade a partir do século XII, a sua situaçom geográfica com umha grande riqueza agrogadeira, para além de estar na rota que ligava Galiza com as Astúrias.

Mondonhedo teve duas judiarias afastadas por pouca distância, embora nom se possa determinar se ambas existiram no mesmo período. 

Localizaçom das Judiarias de Mondonhedo. GoogleEarth

A primeira achava-se na Ruela da Lenha, situada muito próxima do seminário e que contava com umha única entrada, tornando a rua num círculo estreito de casas agrupadas a fim de aproveitar o calor das habitações.

A segunda judiaria estava na ruela situada atrás da Fonte Velha, à que se acede por umhas escadas estreitas.

Fonte Velha de Mondonhedo, no acesso ao bairro judeu.

Escadas de acesso à Judiaria de Mondonhedo.

Amiudamente estas duas judiarias som consideradas umha única judiaria, como acedendo a ela tanto pola Rua Fonte Velha quanto pola Ruela da Lenha, defronte do Seminário de Santa Catarina.

No entanto, consoante a tradiçom popular, o bairro judeu achava-se extramuros na zona do rio, no bairro dos Moinhos.

Arruamentos judaicos do bairro dos Moinhos de Mondonhedo

Imagem: Eva L. Parginha

Imagem: Eva L. Parguinha

Imagem: Eva L. Parguinha

O bairro dos Moinhos recebe esse nome pola presença nos seus arruamentos de várias dessas construções, já sem uso mas recém restauradas conservando a arquitetura e feitio tradicionais.